香蕉蛋黃糕(製作只需3分鐘)

香蕉蛋黃糕(製作只需3分鐘)
懶媽料理又黎~真係超級易整~所以我成日整🤣

香蕉大半條
蛋黃1個

香蕉壓蓉，加蛋黃撈勻後倒入模內，放入已預熱至180度的焗爐焗10-12min，ok!!
*如果想軟身d就加多d香蕉，想實身d就少d香蕉

(原來呢個我無寫食譜，所以而家補寫放上黎，自己做紀錄😂)

葡汁雞翼 + BB菠蘿炒飯

食譜:葡汁雞翼 + BB菠蘿炒飯

今日有朋友黎食飯，我整左個泰式晚餐😋
而家🍊長期覺得隔離飯香，成日都嘈住要食我食緊既野，為左唔想佢嘈嘈閉，我就整左一set:
“🍊🍊泰國菜”😂😂😂
🔹️菠蘿炒飯
🔹️葡汁單骨雞翼
🔹️生菜包
🔹️串燒雞牛豬
一開餐吉好開心😂從未見過咁新奇既晚餐!!每樣野都好心急拎黎試~🤭

當中我推介菠蘿炒飯同葡汁雞翼，但生菜包同串燒我就唔推介😂因為生菜包…吉一食就皺眉，輕輕咬左兩下生菜就say no😂串燒我只用左蒜頭醃2個鐘就焗，雞食晒，牛食左一半，豬食唔到😂

🐔葡汁單骨雞翼:
感謝 #唯唯媽與唯尼b 食譜提供，我再跟據自己喜好作出調整😊，製作清淡版，吉好鐘意，食完自己d雞翼仲想食大人版果d😑

材料:
雞中翼2隻
(我連大人份量一齊煮，所以一開始係煮12隻)
南瓜少許
蕃薯一小碌
合掌瓜少許
調味料:
蒜蓉1粒
有機黃薑粉 (我用細孔鄧左8下)
椰漿兩湯匙
1)雞翼解凍洗淨印乾，中間剪開，用蒜蓉醃30min
2)蕃薯、南瓜及合掌瓜去皮切件備用
3)鑊落少少油，將雞翼兩面煎香備用
4)鑊落少少油，將蕃薯及合掌瓜略炒，加水剛蓋過材料，大火煮滾後轉中小火煮10min，加入雞翼、南瓜及黃薑粉煮10min，加椰漿煮滾，ok!!
*我係連大人份量一齊煮，做完(4)盛起吉要食既份量後，我就再加多d黃薑粉同椰漿

🍍BB菠蘿炒飯
材料:
新鮮菠蘿1/3個
飯大半碗
新鮮蝦5隻
雞上脾肉少許
雞蛋1隻
蒜頭1粒
黃薑粉少許(我用細孔鄧左4下)
咖喱粉少許(我用細孔鄧左1下)
1)雞上脾肉前一晚洗淨切粒用鮮橙汁醃一晚
2)將菠蘿打直切去1/3，菠蘿果肉用小刀和匙羹刮出後再切粒(吉用1/3，大人版用2/3)
3)蝦去腸洗淨切小粒，用少少胡椒粉醃10min備用
4)蒜頭切成蓉，鑊下少少油，炒香蒜蓉下雞肉及蝦炒香至9成熟，盛起備用
5)鑊下少少油，雞蛋炒至半熟，加入冷飯，炒至粒粒分明，加入咖哩粉和黃薑粉炒香，雞肉和蝦回鑊同炒，最後加入菠蘿略炒，ok!!
*切出菠蘿粒後，大人版用淡鹽水浸半小時，會更甜
*飯我係中午煲好放雪櫃雪三四小時後再用黎炒
*炒飯的食材可隨個人喜好加減，自由配搭
*大人版我再加入腰果及肉鬆及調味料
*刮出菠蘿後，菠蘿會有少少出水，用紙巾印乾底部的菠蘿水才放入炒飯(但其實我怕吉倒瀉，佢不左兩下我就拎走菠蘿，將d飯倒返入佢碗😂

芝麻雙色蛋糕

低筋麵粉20g
冰雞蛋1隻
糖5g(可按喜好減糖)
配方奶5g
黑芝麻粉6g
油2g(我用煮食的葡萄籽油)
*份量4杯

1) 蛋黃與油撈均，加入配方奶攪拌，再篩入麵粉撈均，同時焗爐預熱160度
4) 蛋白用打蛋器打至粗泡時加入糖，然後打至企身(反轉碗也不會流下來，我打了大約2分半鐘)
5) 將1/3的蛋白霜倒入蛋黃糊輕輕力撈均，然後將蛋糕糊倒回入餘下的2/3蛋白內輕輕撈均
6) 將蛋糕糊倒入模中至3分滿，然後蛋糕糊篩入黑芝麻粉輕輕攪拌，將芝麻蛋糕糊倒入剛才的模中至8分滿
7)放入焗爐焗15min，熄火焗2min，用牙籤或筷子插入蛋糕中，取出沒有蛋糕糊痴住便ok!!
*每人焗爐火力不一樣，要間中觀察一下有否烤燶

Risotto~南瓜蝦肉意大利燴飯

對住唔鐘意食飯既🍊，整到一餐佢會自己狂不黎食既飯，我開心到真係好想開支香檳黎慶祝🤣🍾

 南瓜150g

白米50g

牛奶150ml

水100ml

新鮮或急凍蝦3-4隻

粟米粒40g

洋蔥25g

蒜頭一粒

無鹽牛油5g

 1)南瓜與粟米先蒸熟，南瓜用叉壓成蓉，與100ml牛奶撈均備用。粟米切出粟米粒備用。

2)易潔鑊細火落牛油，落蒜蓉略炒，再落洋蔥略炒，然後落蝦及粟米粒略炒。

 3)加入白米、牛奶南瓜蓉，水100ml撈勻，大火煮滾後轉中小火煮8min，再加50ml牛奶繼續煮多7min，中途經常攪拌以免痴底，米熟透後，我便轉中火煮至想要的黏稠(我再煮多3min及不停攪拌)，ok!!

*每款米的吸水情況可能略有不同，如太乾水中途可再加入奶或水，煮的時間亦看情況自行調整。

*蝦我無特別用邊款，因前兩日係Aeon買左越南急凍蝦，我就用呢款😂

雞蛋餅(無油)(製作簡單，只需10分鐘)

蛋黃2個
粟粉7g
糖5g(可自行減糖)

焗爐預熱180度。用電動打蛋器將2隻蛋黃微微打至起泡後，加入糖以高速繼續打發至淡黃色並有紋路(我大約打了4分鐘)，篩入粟粉，再用低速打發約30秒，然後再用刮刀撈均(因兜的周邊會有粟粉黏住打發不到)，蛋黃糊倒入吱袋/密實袋(密實袋下方的角剪大約7mm)，於牛油紙上吱出一個
個圓點，圓點之間要預留膨脹空間，放入已預熱180度的焗爐焗8min後，再待5min後才取出~ok!如果食唔晒，可放涼後立即放入密封食物盒保存，保存兩三天，盡快食用。

小技巧:
我發覺吱圓點時要快快手，因圓點會有少少散開，如果慢慢吱的話，吱到一半時，前一半已有d圓點散開痴住隔離🙈所以要快，趁佢未散開就要放入焗爐，同最好每個圓點只吱一下，咁就平滑靚仔d，我吱好晒之後仲剩幾ml蛋黃糊，我就在之前幾粒補吱幾下，焗完似兩個圓點上下叠住😂

BB版粟米班塊

粟米同魚都係🍊既至愛之一，粟米班塊令佢ko左大半碗飯~~~🤤😆
班腩一舊(可用魚柳)
粟米一條
露筍幾條
蛋半隻
蒜頭2粒
牛油3g
芝士4g
配方奶100ml
1)魚洗乾淨，先用薑葱蒸熟，備用
2)粟米切件蒸熟，用刀將所有粟米粒切出，一半放入攪拌機，再加入100ml配方奶開機攪拌成粟米蓉。
3)蒜頭刴成蒜蓉，開細火下牛油，將蒜蓉炒香，再落露筍略炒，然後將(3)的粟米蓉及餘下半條的原粒粟米落鑊大火煮滾，再轉中火煮5-7min，煮至露筍淋，便可加芝士煮溶及半隻蛋做蛋花，再加半茶匙生粉水煮至杰身成汁，加已蒸熟的魚輕輕撈均，ok!!
*加芝士因為我無落鹽，所以要加少少芝士俾d咸味佢
*我今次用班腩，個樣我影相放係留言，但…我其實唔知佢叫乜魚😂因為係吉嫲買既，班腩呢個名係我改俾佢既🤣🤣用佢煮就會硬淨d，肉無咁易散，但其實用超市既魚柳都可以

牛油果蛋沙律飛碟

早前經過12蚊店，買左呢個飛碟三文治器，又幾好用喎😍😆
今日午餐要去一個無餐枱既地方食野，所以我就只帶三文治，呢個用具又唔會令d餡流晒出黎，又唔會好似飛碟機咁熱氣，又易整，夾埋大力壓幾下個邊，就變左漲卜卜既🥑牛油果蛋沙律飛碟🤤

牛油果蛋沙律食譜:
牛油1/4個
蛋1隻
配方奶30ml
雞蛋凍水落煲烚10min，剝殼然後將蛋白切碎，用叉壓蓉牛油果及蛋黃，加入30ml配方奶攪拌，再加入碎蛋白撈均，ok!!

*我太貪心放得太多餡，夾完有一邊轉頭就爆開左😅如果爆餡，用叉壓幾下，就可壓返埋個爆口🤣~(相片附在留言)

磨菇汁翠玉瓜雞柳長通粉

第一次整磨菇汁，估唔到🍊好鐘意，其實我覺得賣相唔係咁靚😅不過又幾好味~🤣🤣

磨菇6粒
翠玉瓜少許(隨意)
無骨雞上脾半塊
椰菜一大片(可以不加)
洋蔥少許
配方奶70ml
無鹽牛油3g
芝士少許

1)早一晚將雞上脾洗淨切粒，用鮮橙汁醃一晚
2)長通粉煮10min，熄火焗20min備用
3)雞上脾落少許香草蒸熟，同時翠玉瓜及椰菜都一齊蒸熟
4)磨菇及洋蔥切碎，慢火下牛油煮溶，落洋蔥略炒，再落磨菇炒至軟身，加入配方奶煮兩三分鐘，然後倒入攪拌機，再加入蒸熟的椰菜攪拌成磨菇糊
5)磨菇糊倒回落鑊，加入雞上脾、翠玉瓜及長通粉煮一兩分鐘，加入芝士煮溶，ok!!

*如加入芝士後仍然覺得希，可加少少生粉水埋芡，不過我無加
*加入椰菜是想有少許菜，不加也可

懶媽料理~(電飯煲製作)超簡單😆無水蕃茄紅蘿蔔翠玉瓜粟米煮雞脾

唔洗睇火、一煲過唔洗煩、蕃茄仲可以撈飯，正!😆

雞脾2隻
蕃茄4個
紅蘿蔔1/3條
翠玉瓜半條
粟米1條
蒜頭2粒

雞脾前一晚用橙汁醃一晚，蕃茄、紅蘿蔔、翠玉瓜、粟米洗淨切件，蒜頭拍扁，備用。

將材料一層層放入電飯煲:最底蕃茄+蒜頭2粒➡️紅蘿蔔➡️粟米➡️翠玉瓜➡️雞脾放最頂，按著電飯煲煮飯掣，煮35min，ok!!

 

*翠玉瓜唔好切太細條，煮完會好淋，亦可配搭其他瓜類

芝士白汁雞肉粟米磨菇飯

唔鐘意食飯既🍊都差唔多食晒成碗😆

雞肉65g
磨菇1粒
粟米半條
芝士7g
蒜蓉少許
無鹽牛油3g
配方奶100ml
飯適量
麵粉1茶匙

雞肉切碎，用少少香草(我只鄧左一下)醃5min，磨菇切成小粒，切出粟米粒，慢火落牛油，將蒜蓉爆香，雞肉略炒，再加磨菇及粟米略炒，落1/3碗水加蓋將粟米煮淋，收水後加入配方奶及芝士，最後加入麵粉水煮至杰身熄火，舖在飯面ok~

瑞士卷(車厘子餡)(易潔鑊版)

 尋日有朋友話好想整野食俾bb，但又無焗爐，我今日就試下用易潔鑊整瑞士卷~連吉嫲都讚不絕口話好鬆軟好好味😆

雞蛋2隻
低筋麵粉50g
糖8g
油8g
配方奶40ml
車厘子5粒

車厘子醬做法:
洗淨車厘子，一開四，用最細火，倒入車厘子，一邊煮一邊壓爛車厘子，車厘子爛得8899後，加入半茶匙麵粉水(麵粉+凍水)煮至少少杰身便ok，放涼備用。

蛋糕做法:
先將蛋白與蛋黃分開，蛋黃、油、配方奶撈均，篩入低筋麵粉攪拌成蛋黃糊。蛋白加一半糖用打蛋器打一陣，再加入餘下的一半糖打至企身(約2min)(反轉碗也不會倒下)，將1/3的蛋白霜加入蛋黃糊中搞均，再將蛋黃糊倒入剩下的蛋白霜中輕輕搞拌。易潔鑊落幾滴油，再用廚房紙抹均，用最細火，倒入蛋糕糊，蓋上鑊蓋，我煮了大約10min，然後用筷子插入糊中，取出如無糊黏住便ok!放在牛油紙上並塗上車厘子果醬，趁熱時捲上(用牛油紙輔助)，將牛油紙兩邊扭實，好似粒糖咁🤤放涼後便可取出切件ok!!😁

*捲瑞士卷時要趁熱卷，因熱可造形，凍便定形
*捲第一下係有d難，不過只要用力少少捲實d，之後就唔難捲
*果醬不要舖得太多，我因加得太多，爆晒漿咁，捲到後半部要不'走'd果醬先可繼續捲😂😂