《提供沙灘玩具既親子餐廳~兩手fingfing黎玩沙🤣》

捉住夏天既尾巴🏖~趁晴天就去沙灘玩多次~
不過都有d涼，我地就唔落水只玩沙，所以我地揀左馬灣既《CafeRoma》

去馬灣我地專登揀去荃灣海濱公園旁既碼頭搭船過去，同🍊搭下船~

可惜佢無特別興奮，可能佢覺得搭船同搭車咪差唔多😅(興奮的只有媽媽…)

《CafeRoma》係馬灣既親子餐廳!!佢唔係有波波池既餐廳，不過我都覺唔錯😍，因想玩沙既朋友仔黎呢間餐廳用餐就非常岩，餐廳會提供一大堆玩沙玩具、車車、滑梯~

可以兩手fingfing黎，拍拍羅柚就走，乜都唔洗帶😂

而且餐廳係一大塊落地玻璃，大人可坐喺餐廳入面涼冷氣，小朋友喺餐廳出面自由玩沙(爽呀🤤)，唔放心的話，要求坐餐廳出面都可以，玩沙旁邊都有3張枱~

不過都幾full，要預早book枱(我walkin黎佢話full左要等😭好彩10min後有枱取消我地先有得入🙇‍♀️)

餐廳有兩款兒童餐~分別係pizza同意粉，包含餐湯、主菜、生果、果汁，

意粉仲有兩條好迷仔既蘿蔔仔，個樣好可愛，吉仲好鐘意添😂，

兩位小朋友都極速ko左意粉，而pizza就普通(可能pizza太薄，佢地應該鐘意厚批多d)，

如果平日黎仲有《兒童薄餅工作坊》自己做pizza(可惜我星期日黎無🙈)~

餐廳仲有1個書櫃，有好多英語繪本、機關書等，食完野可以睇陣書先去玩沙~

食飽飽~玩飽沙~~就埋單出海邊玩陣，可惜吉突然淆底獸上身，唔要落水話好驚😑

好彩帶左架發泡膠飛機同水槍，玩左陣就走囉～

離開時我地夾唔到船期(因每日得3班船往來)，所以我地就行返去馬灣公園附近搭巴士~

總結:
星期日既馬灣沙灘都唔多人，沙灘都唔算多碎石，係游水玩沙唔錯既選擇之一~

而CafeRoma野食唔錯，又提供埋沙灘玩具同繪本，聽講玩具仲好似可以借出沙灘玩添(不過我地無借到)，想玩沙又可以唔洗帶一大堆玩具黎~我覺好方便🤣👍🏻

《電動車任玩的遊戲室》屯門悅品酒店兩日一夜之旅

一大班朋友夾時間去旅行真係一件唔容易既事，兩日一夜喺香港book間酒店玩返晚都係個幾好既選擇🤣

今次我地揀左屯門“悅品酒店”，因為佢有個playroom，裡面有電動車任玩，而佢官網仲有package係全日任玩!就吸引左我地去book~

一行十人先約喺V City一齊午餐，然後再經過屯門西鐵站行多兩分鐘就到，遠處已望到有隻吹氣企鵝在外牆，行到酒店門口，就見到企鵝揸緊火車，

推門入去升降機大堂都係火車既背景😍~

地下有另一入口，有半架大火車~但因在鏡旁邊，睇出黎就好似一架火車咁🤣，不過呢個入口無升降機只有扶手電梯，我地有bb車所以影完相就返去另一邊搭lift~

上2樓大堂checkin，一出lift，哇…都幾多人排隊😅，

我地大約2:30黎到，排左30min隊終於checkin完成，好彩我地自備左架車(車形行李箱)黎🤣，4個小朋友輪住玩，

再加上大堂有好多火車模型，大約有十多架放喺展示櫃中，

仲有1架按時就會開動既火車在大堂中央!隔一陣就會見到有小朋友圍住火車路軌等火車開動~但注意!火車係眼看手勿動，吉就係唯一一個火車開動中拎起左火車既小朋友🤦‍♀️要麻煩職員重新整理一下🙇‍♀️(sorry…😵)

搭lift去適合既樓層，我地間房係“泰國房”，一出lift就見到隻白色大象，

但其實房又無乜泰國feel😂(房既相片我係check out時先影，所以有d亂😅)

放低行李喺房就立即去playroom玩，一去到playroom見到counter張枱係用半架車黎做裝飾，好特別呀～

playroom分兩邊，一邊係遊戲軟墊一邊係電動車場，

遊戲軟墊中有一組滑梯、

一組搖搖板、

一組只夠一人玩既彈床😂

仲有其他小型玩具，例如(煮飯仔、lego等等)，

玩左陣我地就去電動車~~~車場最多只可俾5架車行駛，所以一去到要等一陣，大約10min後就可以玩啦～

可惜吉對電動車興趣唔太大，可能唔太識控制架車，踩得油門黎又控制唔到個軚盤，佢努力完一輪之後都係似碰碰車多d就想棄車潛逃，職員哥哥應該睇唔過眼就俾左個遙控器我地
，吉個樣就☹➡️😄，仲撓埋手添🤣🤣

另外仲有一個小衣櫃係放d角色扮演既小朋友衫，大家可以拎黎扮下靚靚~(但我唔記得影相)

(扮太空人既吉吉🤣)

玩到4:30pm就趕住走，因為…checkin時每房送左2張雪糕卷，一定要3-5pm呢段時間先可以換，所以我地4點半就要去換雪糕啦～然後返房午睡一陣💤我要等唔食得雪糕既吉訓左，我先可以食雪糕，但酒店房雪櫃太弱啦…吉訓著後雪櫃都已變奶昔😭

訓醒食過晚餐後(晚餐我地叫左pizza🤣)，又去playroom玩多20min，但小朋友點夠喉🙈所以我地就行左去屯門公園玩，小朋友們勁開心喪放電，可惜玩左5min就落雨😭，不過我地去左vcity食糖水，咁小朋友們又開心返🤣

第朝早餐要有心理準備，都幾多人排隊…食物方面普普通通，但各爸爸就好不滿d咖啡，有咖啡顏色但淡過水😂早餐後再去playroom玩，呢個係高峯時段，好多人…

(睡衣都未換就黎玩…)

不過玩玩下有d人開始走，咁又ok~玩多1hrs就去checkout，結束我地呢個行程~🥰

總結一下：玩既地方比我想像中細，不過小朋友們都玩得好開心，遊樂墊果度係有好多玩具，但高峯時段好多人時其實幾混亂，lego、煮飯仔散落周地都係😅同遊戲室只有中段12-1pm關閉，其餘時間都開放(開9am-9pm)，我同朋友都考慮過衞生問題，覺得1-9pm都無人清潔好似唔太衞生😅，不過電動車任玩真係好抵，出面玩都要幾十蚊十幾分鐘~我係中秋節連續兩日紅假去既，價錢$867(已加一，包兩大兩小自助早餐及playroom任玩、兩杯H雪糕及一晚住宿)，假日呢個價錢就可以同家人同朋友有個小小的渡假旅程我覺得幾抵呀😆~
(由於最近太忙，所以中秋去完咁耐先出post真係唔好意思🙇‍♀️最新既價錢大家要自己上官網check返😅)