《親子遊》馬鞍山親子餐廳Whizbo Kids Cafe

馬鞍山早兩個月開左新親子餐廳，終於同朋友夾到時間去玩~

同其他親子餐廳有少少唔同，其他親子餐廳多數都係進入遊樂區先至除鞋，呢度係一去到餐廳，接待處職員就會每人派一對新襪，穿上新襪先至可以進入餐廳，而本身既襪同鞋就放係接待處旁既儲物櫃裡，所以感覺好乾淨~

 (下次再黎，如果帶返呢對餐廳襪黎著，就可以減5蚊)

餐廳玩樂區有6個部分(不過每個部分都唔大既):
1)《木粒仿沙池》:一入餐廳就見到，係吉吉當晚最愛既部分，有六七成時間都係呢度玩~

2)《繩網+滑梯+波波池》:爬2層繩網就可以sir滑梯(吉爸話協助吉爬2層繩網係好累既事😂)

 滑梯連接住波波池

波波池裡有投射螢幕遊戲，可以用d波波黎玩遊戲

3)《模擬廚房及超市》:平時超愛煮飯仔既吉，今次改為玩超市

好滿足咁推住架購物車shopping~

另一愛既玩具就係dyson吸塵機(終於唔洗搶媽媽果部黎玩!😂)

喺廚房同超市中間，有個位幾得意，係投射農田既影像喺軟墊度，當中有d植物同有d羊仔跑黎跑去，搵手拍d羊就會拍走左佢~

4)《化妝間》:幫公仔化妝，仲有d卡通造型衫可以俾小朋友著

吉無去玩過，但朋友囡囡玩得好開心

另一朋友仔仔就著左超人衫後勁開心周圍走，但佢著左10min媽媽就叫佢唔好再著，因熱到成身大汗🤣

5)《彩色繩網陣》:小型繩網，無乜特別，吉無玩，朋友仔仔玩左1分鐘就走左…

6)《投影魚缸》:喺旁邊將魚魚咭紙塗上顏色再掃描

就可以係螢幕上見返自己條魚~

不過吉無玩…佢唔肯離開個沙池😅

食物方面:
一去到每位小朋友就有1件杯子蛋糕~

小熊白汁三文魚飯:好可愛!!味道都唔錯~

卡通壽司配蟹子沙律及玉子:普普通通

鮮奶咖啡:味道ok

另外好欣賞佢既洗手間，有兩格，每格都有大人小朋友廁所，洗手處亦有高低洗手盤

供大人小朋友都可以用~~仲有另一房係換片間👍🏻
(我試過有親子餐廳無換片既地方，要行返出商場換，好唔方便)
消費偏貴，我地星期日5-7pm去，小朋友入場費$188，大人最低消費$120，我地叫左以上食物，埋單五百幾~(不過大人未飽既，吉爸離開餐廳後，就去樓下食碗飯再加個拉麵🤣)

總結:我覺得都幾好玩，但其實玩樂既地方唔大，好彩當日餐廳只有約50%入座率，咁就岩岩好，如果滿座，咁玩樂時應該就會超迫…另外，星期日限入座2小時其實好趕，玩得黎又食唔到野😅

超簡單懶媽料理🤤《電飯煲南瓜滑雞飯》

🍊超鐘意!雞好滑，南瓜又甜~佢一開始就不停食，食晒後仲想Lam埋隻碗咁濟😂見佢咁欣賞，媽媽我真係好感動~!😚

雞脾3隻(全家一齊食)
南瓜適量

做法:
1)雞脾洗淨切件，用1.5茶匙bb豉油、少少糖&麻油&生粉醃60min或以上
2)南瓜洗淨去籽去皮切件備用
3)電飯煲啟動後大約5min，打開蓋見水開始滾，立即倒入南瓜，再倒入醃好的雞件，蓋好，待飯煲跳掣後焗多30min，ok!!

*由於我煮3隻雞脾係比較多，我放埋雞骨入去煮，其實滿到唔係好見到d南瓜(製作好我就夾起雞骨影相😂)所以我放在飯煲內煮的時間亦相對變長。如果只煮一隻雞脾的話，可待飯煲冒出很多水蒸氣時才加入雞件，飯煲跳掣後焗多20min就ok~

《親子遊》香港花卉展覽之吉吉拍拖日…only 5min

🍊病左幾日，又落左幾日雨，好似好耐無去玩~見今日差唔多好返晒又無乜雨，仲要花展開鑼，就想帶住小情人🍊(懶浪漫咁)去拍拖🤤

 無去過花展既我，一入埸就好興奮咁:
“吉吉~我地自拍呀！” “吉吉~睇下d花好靚”
“吉吉~有好多唔同款既花”
一開始吉都好配合，影相又笑，又好認真咁賞花☺但美好既光陰就只有5分鐘…

 之後………
👩🏻:“影張相呀☺～”
🍊:“…跑跑跑!(逃走左)”
👩🏻:“拖住呀💕～”
🍊:“…吉吉避開!(繼續想逃跑)”
👩🏻:“去呢邊睇下呀～”
🍊:(佢行另一邊)😑
👩🏻:“🔥🦖拖…住…我!”
甜蜜情人mode眨下眼就變返恒常媽媽mode…🤡

雖然吉對花無乜興趣🙈賞花既得我一人😂，我覺得都值得去呀～因為都幾靚，同俾小朋友認識一下有咁多唔同款既花都唔錯~😆

展覽日期:15/3-24/3
時間:9am-9pm
地點:香港維多利亞公園
入場費:成人$14。4至14 歲兒童、全日制學生、60 歲或以上長者及殘疾人士及其照顧者$7
(星期一至五:60 歲或以上長者、殘疾人士及其照顧者免費)

《親子遊》黃金海岸酒店~生日假期住宿計劃

 “以往我曾經送過12份生日禮物俾你，不過物質棄掉了就好容易唔記得，今年既生日我送一個經歷俾你，因為回憶先係最難忘”

今年吉爸既生日，我靜雞雞訂左黃金海岸酒店既生日package做禮物，而吉爸就以為只去食自助餐，當自助餐既途中，我就講左以上既說話，再補充一句“我地上去開房啦”，吉爸笑到差d連水都噴埋出黎😂，🍊見我地爆笑佢又跟住一齊傻笑~

“生日假期住宿計劃”包括一晚住宿，雙人自助晚餐，雙人午市套餐，生日蛋糕1個(估唔到又幾好食)，汽酒1支，姓名刺繡手絹1份，鯊魚冒險島1節，退房時間延至2pm，價錢為$2200(加一服務費)，價錢都合理，因本身自助晚餐都要$638/人，午市套餐都百幾蚊一份，當去左個小旅行咁，其實都唔錯😊~

 黃金既自助晚餐幾年前食過覺得幾多野食，今次再食都唔差，但可惜無生蠔，有埋就滿分，我鐘意佢有個戶外區，有燒豬、燒魚頭、燒烤食品、海南雞煲仔飯等~而用餐途中會有一位歡樂哥哥行去每張枱度扭波波俾小朋友，🍊見到好開心，佢係第一次收到扭波波🤣

間房都幾大，🍊當然好開心，周圍跑，由於天氣涼無得去泳池，所以我淘左d沖涼玩具帶黎玩，吉好鐘意，尤其隻識嘔泡泡既蟹😂第朝訓醒眼都未張開就話要沖涼🤣

 “鯊魚冒險島”係吉最鐘意既部分~首先係人唔多，多數都係酒店住客，地方亦都幾大~

接待處已經有張鯊魚形既枱，

入去裡面有一個兩層既攀爬區，當中有個彈床係入面，爬到最頂可從旁邊既旋轉滑梯滑落黎，就會係鯊魚既口出返黎😆，

另一邊有隻半船，都係用黎爬既，

再另一邊有好多軟身既大型lego，

仲有幅攀石牆，

旁邊有個小書櫃，

隔離有間幼兒房，當中既設施適合較細年紀既小朋友玩~我地食完晚餐去玩，50mim對吉黎講完全唔夠喉，玩到唔捨得走(老實講又真係幾好玩)，所以就應承佢聽日午餐後再黎，小朋友真係好好記性，佢第朝一訓醒除左話要沖涼外，就成朝不停講baby shark😂

價錢係:
50分鐘一節(一大一小)住客$100，非住客$150，(另加一位大人)住客$50，非住客$80
營業時間:10am-10pm