蕃薯蘋果餅(製作容易)

蕃薯甜甜，再加上蘋果蓉，甜得黎又有d清新感覺🤣我覺得好好味~

蕃薯60g
蘋果蓉30g
蛋黃1隻
奶粉半匙

蕃薯蒸熟壓蓉，蘋果刮蓉，將所有材料撈均，不落牛油紙上，放入已預熱至180度的焗爐焗10min，再轉200焗多3min，OK!
*蕃薯壓蓉不用壓得太細滑，以至失去口感
*蘋果蓉份量可按個人口味加減
*刮蘋果蓉時流出黎既蘋果汁都加埋落去呀～😆
*我呢度得半條蕃薯(60g)(尋日食左半條🙊)，我之前試過用1條蕃薯，都係用返1隻蛋黃都ok，不用額外加蛋黃。
*呢個份量我整左12粒

自製星星餅😋(蕃薯味)(無糖)

蕃薯50g
低筋麵粉20g
無鹽牛油7g
蕃薯蒸熟壓蓉，加入牛油及低筋粉撈均，然後造型，入焗爐160度焗12min，輕微金黃就OK~外微脆內軟身🤤唔好焗太耐，表面會變硬!

(試左整2次星星形同1次圓形，其實圓形最理想😂，因為整星形果5隻角較受熱，所以5隻角會有d脆，脆身吉吉唔係好食到，而圓形受熱較平均，吉下午茶一次過食左三十粒😅😂😂)
(圓形做法我係搓成圓球狀，再輕輕壓一壓就ok)

粟米蝦餅~

之前俾過吉食兩次白焯蝦，佢都係食1隻就算，今次試整蝦餅，佢就食左3舊啦~😊

蝦4隻(我整左4塊)
粟米一小碌
生粉約2茶匙
粟米先蒸熟切粒備用，蝦去殼切碎，加入粟米及生粉撈均(因無加鹽，所以比較難起膠，因此要加多少少生粉)，細火慢慢煎，中途我有加少少水加蓋焗一焗，咁就ok!!!

芝士蛋糕

去playgroup吉實玩到唔願走，所以我要帶d茶點去引佢走😂蛋糕係個好好既選擇~今次蛋糕好受歡迎，吉朋友:樂兒姐姐同滔滔哥哥都分別食左3舊，吉就食左5舊😋😆😆

材料：
低筋麵粉 40g
芝士 31g
配方奶 20g
無鹽牛油 15g
雞蛋 2隻
糖 6g

做法：
牛油放入碗中用熱水座溶，芝士切細細粒。分開蛋黃和蛋白，將蛋黃打至淡黃色，然後加入配方奶、牛油、芝士碎及篩入麵粉撈均。糖加入蛋白中，將蛋白打至企身。將1/3蛋白加入蛋黃糊中輕輕力撈均，然後將撈好的蛋黃糊倒入餘下2/3的蛋白中輕輕力撈均。
焗爐預熱至160度，將蛋糕糊倒入cupcake杯中，焗大約15分鐘ok。

*焗好後，要慢慢打開焗爐門，以免cupcake立即遇冷空氣縮回。
*材料芝士點解31g咁伶仃，因為屋企咁岩淨返31g芝士😂
*芝士我係aeon芝士櫃檯買一大磚切出黎既減鹽芝士
(唔知點解今次焗蛋糕變左龜裂面，變左菠蘿包咁款😂🤔不過味道同質感係好味既😋haha🤣🤣)

黑芝麻香蕉燕麥餅(超易製作)

今日下午茶，吉食左16件!!好彩我抽起左兩件留俾朋友仔仔，唔係吉就會食埋…😅
做法:
香蕉1條
即溶有機燕麥大約2.5湯匙
無糖黑芝麻粉1湯匙
香蕉壓成蓉，加入燕麥及黑芝麻粉撈均，焗爐預熱至160度，焗10min，ok!!
*燕麥份量要睇返香蕉size而決定，因吉唔鐘意食太脆或硬既野，所以燕麥份量，我係落到好似飯仔咁稀少少就夠。

三文魚菜心蛋捲

又黎簡易製作食譜🤣

三文魚一小舊
菜心葉3塊
蛋1隻
三文魚及菜心蒸熟，然後壓碎及切碎，加入蛋中撈均，慢火煎至周邊開始乾身便可捲起來~捲好後加蓋慢火煎多1-2分鐘，以防裡面有蛋汁未熟，熄火切件食得😋
吉狂風掃落葉式，眨下眼就食晒一條蛋捲lu~
(其實我本身想落菠菜，但見有菜心未食晒，就用左菜心😂)
*加少少油，再用廚房紙抹均，咁就完全唔痴底會易d捲。
*不要太熟才捲，要表面半熟狀就捲。
*用鑊鏟捲時，另一手用筷子協助一下，在摺的位置篤住才捲。
*蛋液不要倒太多，因太多會太厚捲唔到。
👆我自己既蛋捲小技巧🤣

蘋果乳酪pancake

材料:
蛋黃1隻
乳酪30g
新鮮蘋果蓉30g
低筋麵粉15g
蛋黃、乳酪、蘋果蓉撈均，篩入麵粉再撈均，慢火慢慢煎至金黃，ok!!
*生果可按喜好更改為其他生果

雞肉南瓜薯餅

材料:
雞肉、南瓜、薯仔(份量2:1:1)
洋蔥隨意
低筋麵粉適量(我今次落左1茶匙左右)
先將南瓜及薯仔蒸熟壓蓉，雞肉及洋蔥切碎，所有材料撈均再加入麵粉，然後慢火煎熟就ok!(煎既途中我會蓋下蓋，我怕中間唔熟😂)

紅蘿蔔豬肉蕃薯餅(士多啤梨醬汁)

我第一次用生果做醬汁，估唔到吉好鐘意!!!食左3大塊🤣仲要超簡單製作，只要士多啤梨就ok!同可
蕃薯餅材料:
蕃薯60g
豬肉70g
紅蘿蔔隨意
洋蔥少許
蛋半隻
生粉3茶匙

蕃薯蒸熟壓蓉，紅蘿蔔及洋蔥切碎蒸熟，與免治豬肉撈均，加入半隻雞蛋，再加入生粉撈均，易潔鑊落少許油，再用廚房紙抹均，用最細火煎，煎既中途我有間中落少少水加蓋煮，因我今次整左大塊d及厚d既薯餅，我怕豬肉中間唔夠熟，所以加蓋煎~
*可用保鮮紙搓做想要的薯餅大小，再落鑊煎
(我本身落2茶匙生粉，但煎完試食覺好易散，所以餘下既一半粉醬我再加多0.5茶匙，咁我覺得好d無咁散)

士多啤梨醬汁:
熟士多啤梨5粒，切碎，倒入鑊中用最慢火慢慢煮，煮到士多啤梨有少少出水，慢慢繼續煮就會變成杰杰地既醬汁~中途要不時搞拌(怕痴底)

BB版Pizza

吉爸超鐘意食pizza，可以自己1個人食1個大批~吉當然要培養下對pizza既興趣🤭~但吉好古惑…4個pizza先用手拎晒表面d餡食晒，然後食1個pizza皮就唔食…媽媽廚餘肚又要出動ko 3個pizza皮…😭

Pizza皮材料:
低筋麵粉150g
酵母2g
糖4g
鹽1g
無鹽牛油8g
奶粉6g
熱水170g(約80度)
先篩低筋麵粉，然後加入酵母、糖、鹽、牛油及奶粉，再慢慢加入熱水搓至三光(睇情況如太濕可再加d麵粉，太乾可再加d水)，放在兜中蓋上保鮮紙發酵1小時。

Pizza餡材料:(可隨意放自己鐘意既材料)
大蕃茄1個
車厘茄4粒
粟米1小碌
免治豬肉適量
洋蔥適量
芝士適量
蕃茄十字放在熱水煮幾分鐘，去皮然後切碎，放在煲內並加少少水(大約5-10ml)煮多幾分鐘變蕃茄蓉，再幾粒糖提升蕃茄味道(可不加)，然後加入麵粉水煮成蕃茄醬汁。洋蔥切碎，與粟米一齊先蒸熟，備用。
(*麵粉我會先在碗中用凍水開成麵粉水才倒入煲內煮，即係好似生粉水咁。因我之前試過直接篩麵粉入煲內，但我覺好似煮極都仲有d麵粉粒仔咁😂)

焗爐預熱至200度，pizza皮發酵完成後，分成4份，搓圓碌平，便可塗蕃茄醬汁，再舖上洋蔥、粟米、豬肉、車厘茄，最後灑上芝士碎，焗15min便ok!!🤤
(*pizza皮不要碌得太扁平，因太薄會變薄批咁脆脆😂)
pizza外圍有d脆(其實我覺脆脆咁幾好食)，但吉唔like脆野，所以我要剪走條pizza邊佢先食到😅😂😂

芝士麻糬波

糯米粉110g
蕃薯粉20g
芝士40g
無鹽牛油35g
配方奶20ml
雞蛋1隻
鹽1g
先將牛油用熱水座溶，加入雞蛋撈均，將糯米粉及蕃薯粉篩1次，加入芝士碎，再倒入牛油雞蛋液撈均，然後慢慢加入配方奶搓均(如太濕就再加糯米粉，相反太乾便再加多少少奶)，將麵粉搓成圓形(約湯圓size)放在牛油紙上，放入已預熱至180度的焗爐焗20min，ok!
*原本食譜係用木薯粉，但我樓下得蕃薯粉!所以我照買😂，咁效果都ok
*芝士可用parmesan芝士粉取代，但就要加多1-2g鹽
(我下次會試焗18min，而家表面太脆，因吉唔太鐘意太脆既野食，所以佢只食左3舊，下次試焗短時間d，希望軟身d~🤔)

牛奶饅頭

牛奶饅頭
吉吉尋日訓到10:45am，所以我有時間搓饅頭做早餐，簡單一點做牛奶饅頭，甜甜地清清地，吉尋日食左1.5個，今朝食左2個😆

高筋麵粉50g
低筋麵粉100g
(因為我無中筋麵粉😅，如有中筋麵粉可直接150g)
酵母2g
配方奶75g(用大約70度的水調配)
糖10g(原食譜15g，我減至10g)
做法:
先將麵粉篩好，酵母及糖加入配方奶中攪拌，然後慢慢加進麵粉中搓至三光，放在室溫5min讓粉糰鬆弛，將粉糰碌平至大約長方形，然後在表面掃上少許清水，便可捲起來，切出想要的大小，然後放在蒸鍋中發酵50min，發酵完成後直接開火，水滾後中火蒸15min，熄火待5min，再打開少許蓋露出小縫讓冷空氣可以慢慢流入，約3min後才開蓋，ok!!

*不用配方奶可用鮮牛奶
*配方奶要熱熱地去搓麵粉，麵粉才可成麵糰。
*配方奶不要一次過加晒，慢慢加，搓至三光便ok，可能不用加晒，相反如粉糰太乾便再加多些奶。
*我先開火一陣，將蒸鍋的水加熱少許(約三四十度)再熄火，讓蒸鍋暖暖地幫助粉糰發酵。
*蒸完後，可以放隻筷子在蓋下做出小縫方便空氣流入鍋內。
*食唔晒就攤凍後立即雪在冰箱急凍，待明天再蒸熱便可再食。

🍌香蕉燕麥條

平時多數整燕麥餅，今次就試下整燕麥條~吉吉好鐘意，食左6舊~
做法:
先將香蕉切開3份，再每份切開一半，總共分成6份。沾上生粉，再沾蛋液，再沾上燕麥，然後在燕麥上輕輕力掃一層蛋液(蛋液要盡量覆蓋表面的每粒燕麥)，放入已預熱180度的焗爐焗10min，ok!!
*我試過煎效果都差唔多，不過我鐘意用焗爐，因為唔洗睇火😆