《親子遊》4米滑梯+沙池+多款遊樂設施的香港公園

之前去動植物公園時經過香港公園，望到佢既兒童遊樂場好正已經好想去，但當時無時間玩，尋日終於再去!

金鐘站F出口，一出就係太古廣場，穿過太古廣場再搭兩條扶手電梯，就到香港公園入口，一去到就見到噴水涼亭，水由涼亭上面流落黎，我以為吉會好想入去玩，點知佢用驚訝既表情望兩眼就繼續行，跟住見到大噴水池，佢竟然指住噴水池問我“果個好恐怖咩黎架”(😂d水係澎湃左d，但未至於恐怖嗎?😂)，我話係噴水池同不停叫佢影張相，佢死都唔肯影仲答我:“會跌落去架，咁就大鑊啦”(聽到佢講大鑊我覺好好笑😂)

繼續行就見到個湖，當中有好多龜同鯉魚，睇左好耐先繼續行~

跟住指示牌行5-10min就到兒童遊樂場

遊樂場分別位於6個不同高度的平台上，但推BB車要留意，只有第一二層有斜路可俾BB車，其餘平台都係樓梯🙈要抬架BB車上去~
一去到就見到長長既半透明滑梯~我立即問吉玩唔玩，可惜佢話驚唔玩…

先玩第一層平台既一座滑梯

然後就去第二層玩沙

老實講，沙唔幼同多碎石，所以最好著鞋😅，沙池中有1個搖搖椅、4個推土機設施(1個維修)同1個疑似搖搖板但唔識動既東西😂…!?

推土機吉唔夠手長又唔夠力，試玩左10秒就放棄

改為玩沙池旁既(扮)揸飛機，因為有軚盤既東西吉都好鐘意玩🤭

公園幾細心，在沙池旁仲有個“洗腳池”可供玩沙後洗腳(唔係水池，係2個水喉位)

第三層，有2個韆鞦、1座滑梯及1座遊戲板

第四層，有2座滑梯相連
當玩到興高采烈時…落大雨😭吉好失望…唯有在旁邊的涼亭休息一下食包餅等停雨…

第五層，分別2座滑梯，但因為落左雨濕晒無得玩囉…但🍊不停同我講“媽咪抹返乾就得架啦玩得架”😅😅

第六層，1座滑梯，好彩有2個軚盤，所以無得玩滑梯既🍊都無好唔開心，玩軚盤玩左好耐~

我去既時候係星期二下午兩三點，玩左一個幾鐘頭，只係曾經見到2個小朋友，好似包場玩咁😂不過成個公園有9條滑梯，假日黎應該都唔會太迫卦🤭

但唔知係咪落雨關係，好多蠓😣…初初我只幫🍊貼左2個蚊貼，我自己無貼，但在涼亭等停雨時，一向唔惹蚊既我被咬左五六啖，🍊就被咬一兩啖，被蠓咬超痕呢😭…呢個公園係好好玩，但下次黎要做足防蚊防蠓措施🙈

(小插曲:我喺太古廣場1樓問客戶服務部職員點去香港公園，佢見我推住BB車，就叫我喺商場搭lift到5樓，喺酒店穿返出去就會到，但我搭lift去到5樓係酒店類似宴會廳樓層，我搵唔到邊條路出返去公園😅，再搭lift去左4樓，點知4樓一出係的士站同旁邊係辦公大樓，😅又搵唔到路就再搭lift去3樓，就係商場，其實商場都有指示方向去香港公園，跟住指示好容易就去到目的地，不過就要推住BB車搭兩條扶手梯🙈)