超正!!愉景灣《EpicLand歷奇王國》大人細路都岩玩!

愉景灣Play House《EpicLand歷奇王國》一直都好想黎，佢既七彩長滑梯同幾層高既迷宮攀爬區實在太吸引人啦！

一行11人(7大4小)去到，朋友負責幫忙在電腦登記資料，好快搞掂可以進場~一入到去大人細路都好興奮:“呢度好大呀🤤”🤣🤣

我地先由BB班開始，先去幼兒區，寫住“適合3歲或以下”，當中有小型滑梯、屋仔、感官捉摸牆、同有個超小型既波波波池~

再去波波池+擧爬區，寫住“適合7歲或以下”，玩左5min，吉要走返去幼兒區😅

有朋友一齊去真好，朋友幫手湊住吉，我去玩啦～🤣立即去玩七彩滑梯，我本身個人超細膽，但我覺好好玩!幾快但又唔算太刺激~

朋友話玩隔離既全黑滑梯，我個膽壯大左就立即答應，上到去一睇真係超黑!條滑梯入面乜都睇唔到，仲要中途有兩段好直…好恐怖…朋友毫不考慮就入左去，我淨到佢尖叫同狂尖叫…我亦毫不考慮咁…玩返隔離既七彩滑梯😂朋友立即話我呃左佢玩😂😂(對唔住，真係太恐怖啦…)

然後再去另一個大挑戰…垂直滑梯!!眼望上去好似無乜野咁，

但上到去…好直呀😵！我坐左10秒都唔敢sir落去…

然後有小朋友黎到我後面想玩，我就讓佢玩先，小朋友們諗都唔諗就sir左落去…佢地個樣好似玩緊普通公園滑梯咁😂(好大膽呀)，我合共讓左10個小朋友玩…我先鼓起到勇氣sir滑去!“好驚呀超級驚呀!我唔想再玩第二次”我玩完既第一句說話😅

媽媽喪玩完返去搵返粒吉啦🤣～見到吉爸抱左吉出左黎想去玩彈床，排左陣先知原來唔夠高度玩…

然後吉爸就帶左吉去玩七彩滑梯!喺下面吉都話玩，點知上到去佢唔夠膽sir落黎，擾攘左一輪，最後吉爸拖住吉一隻手，靚女外藉職員姐姐拖住吉另一隻手，佢先肯sir落黎，吉爸表示好羡慕，佢都好想有職員姐姐拖住陪玩😂😂

然後去玩哥爾夫球場，

再去5層高既迷宮攀爬區，

攀爬區低層有不同既設施，

第三四層有2條滑梯，當中有1條係旋轉兩圈半既滑梯(感覺好似滑左好耐😂)，

仲有氹氹轉、

繩網、

獨木橋等…

去到最高果層，射波波區，有12支固定位置既槍可以互射，喺呢度最忙既位置係爸爸們，佢地負責重要既位置…不停執波🤣

另一邊都有另一個觸摸牆

仲有一d吉唔夠高玩既遊戲：攀石(攀石都有5款)、

飛天繩索、

高空闖關(呢個名我自己改既😂)

玩到累就可以去飲食區休息一下買d野食，朋友點左個小pizza同芝士蛋糕俾小朋友食，大人就飲杯咖啡/奶昔~(掛住食唔記得影相😅)
玩左三個鐘大人細路都散晒!離開就行返出商場出面搭巴士DB03P去欣澳地鐵站~其實都方便，不過留意DB03P要半個鐘先一班車，我地出到黎岩岩走左一架車……

(我地黎既時候係由東涌入黎，因為喺東薈城食野，但原來東涌入到愉景灣要再轉另一巴士先去到愉景北商場，所以下次再黎，我地都會由欣澳入，就一程車就會到愉景北商場去玩lu🤣)